109988: Am Bata Dubh

Chaidh Am Bàta Dubh a sgrìobhadh le Murchadh Macleòid, Liùrbost.

Deoch-slàinte nan gillean ’s e bha mi ri sireadh
‘S e bha mi ri sireadh na fìr anns an àm
Cha b’e mo rùn bhith sa phoit dh’ fhàg cho daor san taigh-òst mi
Ach gaol nam fear òga nach sòradh an dràim.

Air feasgar Diciadain gun shèid i bhon iar-dheas
Gun shil i air lìonadh le sian bhàrr nam beann
Bha i sèideadh cho làidir bhàrr claigean na Càbaig
Gun saoilinn nach fhàgadh i snàile ri crann.

Gun shèid i gu cas oirnn bhàrr fiacail a’ Ghalta
Is i togail cabhadh bho bharran nan tonn
Mun d’ fhuair sinn fo aodach bha dithis ga taomadh
‘S muir bàn fon a’ chaoch air gach taobh a’ tighinn innt’.

Bha bogha-frois dubh-ghorm seachad cul Beanna Bharbhais
Bha dùbhran an anmoich fàs dorch anns na glinn
Bha cuisean ag agairt bhith dlùth air an fhearann
Bha burn is tein’-adhar ga fhrasadh mur cinn.

Siud mar thuirt am ‘mate’ Chan eil math dhol dha beatadh
Cha bhuannaich i fearann le canabhas lom
Gun bhith cinnteach na ceannabheirt cha leig sinn air falbh i
Cha mharcaich i ‘n fhairge tro ainfheas nan tonn.

Thuirt mise ’s mi labhairt “Bheir mise dhi ceartas
Ga cumail aig astar fad ‘s dh’ fhànas i lom
Ga seòladh gu ‘h-easy’ an coinneamh gach ‘heaver’
‘S chan eagal gun dìobair aon ni os ar cionn.

Nuair chual na balaich siud chaidh iad nan cabhaig
B’ iad fhèin na fir-thapaidh neo-lapach san àm
Mus gearradh tu fead bha cuid sheòl am bun seataidh
Bha fear aig gach ‘halyard’ ’s fear ac’ ro gach crann.

Cha bhi sinn a’ gearain ‘s a cuid misdeardan seasmhach
Ged bhiodh sinn mar lachainn a’ placail san taoim
An leth-dusan clach bh’ againn innt’ airson balaist
Chan fhanadh iad ceart leis a chant a bha innt’.

Nuair chaidh i gu astar ‘s a curs air an fhearann
Bu luaith i na an t-seabhag air bharran nan tonn
Ged bha marcach-sine ri dalladh na tìr oirnn
Rinn leth-dusan sgrìob toirt am fianais nan ceann.

Nuair ‘chlearaig’ i seachad ’s a thog sinn am fearann
‘S a chunnaic sinn ceart mar a bha ri dol dhuinn
Cha bu bheag a’ chuis ghealtachd na bh’ eadar mis ‘s Tabhaidh
 Gun saoilinn gun sgathadh i m’ fhalt bhàrr mo chin.

Bha Dòmhnall Iain Mhàrtainn, ged b’ eòlach an làmh e
Ri stiùireadh a’ bhàta tro gabhadh nan tonn
Le shàil ri ceann-ùrlair ‘s a làmh air a chùlaibh
Mus riabadh maid-iùil bhàrr na stiùìr dol an ceann.

Bha mic Dhòmhnaill Thorcaill nan gillean glè sprocail
Le athar caol corrach is gob oirr’ mar lamp
Bha mòran de spòrs orr’ aig meud a cuid seòla
Ach air bìrlinn MhicLeòid cha deigheadh òirleach dhith ’n ceann.